बारामतीत नवीन चारचाकी वाहन क्रमांक मालिका होणार सुरू..
बारामती - पप्रादेशिक परिवहन कार्यालय, बारामती या कार्यालयात दिनांक १२/११/२०२१ रोजी, चारचाकी खासगी वाहनांसाठी नवीन मालिका MH42 BE सुरू करण्यात येणार आहे. मालिकेतील वाहन क्रमांकासाठी ज्या चारचाकी वाहन मालकांना आकर्षक तसेच पसंतीचे क्रमांक विहित शुल्क भरुन हवे असतील त्यांनी दिनांक १२/११/२०२१ रोजी, कार्यालयीन वेळेत सकाळी १०.३० ते दुपारी ०२.०० या दरम्यान अर्ज व विहित शुल्क रक्कमेच्या डी.डी.सह जमा करावा.अर्ज नमूना व आवश्यक कमांकासाठी भरावे लागणारे शुल्काची माहिती कार्यालयीन वेळेत उपलब्ध करुन देणेत येईल.
अर्जासोबत केंद्रिय मोटार वाहन नियम १९८९ च्या नियम ४ तसेच महाराष्ट्र मोटार वाहन नियम १९८९ च्या नियम ४ अ मध्ये विहित केलेल्या पत्त्याच्या पुराव्याची साक्षांकित प्रत सादर करणे आवश्यक असेल. (उदा. लाईट बील, टेलीफोन बील इ.) तसेच अर्जदाराची ओळख पटविण्यासाठी अर्जासोबत अर्जदाराने त्याचे फोटो ओळखपत्र (उदा. आधार कार्ड/निवडणूक आयोगाचे ओळखपत्र/पासपोर्ट/पॅन कार्ड इ.) ची साक्षांकित प्रत सादर करावी लागेल.एकाच नंबर करीता एकापेक्षा जास्त अर्ज आल्यास त्यांची यादी दिनांक १५/११/२०२१, रोजी सकाळी ११.०० पर्यंत कार्यालयीन नोटीसबोर्डवर लावण्यात येईल. एकाच नंबरकरिता एकापेक्षा जास्त अर्ज आल्यास त्या नंबरचे बंद पाकीट लीलाव पध्दतीने वाटप केले जाईल. या यादीतील अर्जदारांना लिलावाकरीता जास्त रक्कमेचा डीडी जमा करावयाचा असेल त्यांनी दिनांक १६/११ / २०२१ रोजी हया दिवशी दुपारी ०२.०० वाजेपर्यंत सीलबंद लखोट्यात लिलावासाठी पसंतीच्या नोंदणी क्रमांकासाठी विनिर्दिष्ट केलेल्या फीच्या डीडी व्यतिरिक्त अर्जदाराचे इच्छेप्रमाणे जादा रक्कमेचे डीडी एका लखोट्यात स्वतः जमा करावा. सदर डीडी 'Dy.R.T.O., Baramati' यांच्या नांवे नॅशनलाईज्ड /शेड्युल्ड बँकेचा बारामती येथीन असावा. त्यासोबत अर्जदारास पॅनकार्डची साक्षांकित प्रत जोडणे अनिवार्य राहील. दिनांक १६/११/२०२१ या दिवशी दुपारी ०४.०० वाजता उपप्रादेशिक परिवहन कार्यालय, बारामती येथे उपप्रादेशिक परिवहन अधिकारी यांच्या उपस्थितीत व्यक्तींसमोर (संबंधीत अर्जदार) लखोटा उघडून ज्या अर्जदाराने विनिर्दीष्ट शुल्कापेक्षा जास्तीत जास्त रक्कमेचा डीडी सादर केला असेल त्यास नमुद पसंती क्रमांक वितरीत केला जाईल.
एकदा आरक्षित ठेवलेला नोंदणी क्रमांक बदलून देता येणार नाही. आरक्षित ठेवलेल्या दिनांकापासून ३० दिवसांच्या आत नोंदणीसाठी वाहन सादर केले नाही तर राखून ठेवलेला नोंदणी क्रमांक आपोआप रद्द होईल व फी सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेली फी, कोणत्याही परिस्थितीत परत करता येणार नाही अथवा त्याचे समायोजन करता येणार नाही.
